فداك يا سمرا
...
متساليش
عن البسمة لو غابت
ولهفة شوقى
لو دابت
متساليش
عن الحزن فى عيونى
ودموع دبلانة
فى جفونى
وقلبى اللى كان يساعى الكل
باعوه ناسك
يا سمرا وباعونى
......
انا اللى قلبى كان طير طاير
رفرف على الكل بجناحو
واقف جنب القريب والغريب
فى افراحو واتراحو
وللمجروح
بلسم يداوى جراحو
ووقت الجد
مشفتش حد حواليا
ومعرفتش هما فين راحو
.....
خانونى يا سمرا
وخانو العيش والملح
وباعو امل بكرة
وباعو نور الصبح
واحلامنا بقت ذكرى
ونسينا طعم الفرح
...
متسالينيش ياسمرا
روحى اسالى ناسك
اسالى الحديد فى ايدين ولادى
اسالى السيف
فى ايدين حراسك
ولما القاضي يحكم
والميزان مكسور
ازاى ياسمرا
ممكن ترفعى راسك
....
عرفتى ياسمرا
انا ليه حزين مقهور
وليه غابت ضحكتى
وليه راح من عينيه النور
وليه غربتى وخدانى وبعدانى
عن الناس سنين وشهور
.....
دا انا ياسمر
حمال حمولك وشيال همك
ااسى كمان ااسى ولا يهمك
فداك ياسمرا
الف عمر وعمر
ولا تسيل قطرة
ياسمرا من دمك
مجدى ابو زيادة.
ليست هناك تعليقات:
إرسال تعليق