( رحمه أم )
بصلى على المصطفى ..اللى ف ايده الحصى ..نادى على ربنا وسبح
احن قلب اصطفى .. احمد رسول الورى .. سيد الثقلين
وصى وشدد وصايته على الام ورضاها
وعشان جميل صنعها ..وصانا نرعاها
لكن الزمان والقلوب دائما بتتغير
وكله فى الامتحان بيدخل كبرنا وصغير
ودى صورة بالكربون بنقلها بامانة
من اللى بيجرى اليوم من قسوة واهانة
ام ومعاها ابنها دخلوا سوبر مركت
وجاب بضاعه كتير فى السله واترصت
بتقوله يا ابنى .. نفسى اشترى اعشاب
هد الزمان صحتى والشعر منى شاب
والعُمر بيا جرى مفضلش غير اطلال
والظهر منى اتحنى ..والدنيا يا ابنى احوال
وانا سانده عل العكاز مش بقدر اتحمل
بس اشتريلى الدوة جسمى بقى ينمل
شخط الولد ف امه شخطة بصوت عالى
اتهز ليها المكان مش شارى وانا مالى
مدت ايديها اليه وقالته خلاص يا ابنى
اشكيك لمين يا بخت للعاق بتحوجنى
شوح لها بايده ..وجهه لها ظهره
وانهارت المسكينة من قسوته ونهره
سندت على العكاز فكراه هيسندها
والدنيا دارت بيها وقعت ف لحظتها
وقف الزمن لحظات ..واتجمد المشهد
على قسوه الواد الذكرة جات تشهد
والام فى الغيبوبة بتفتكر ف حاجات
من يوم ما كان فى كفولة من صدرها بيرضع
شربت يا ابنى المر عليك عشان تكبر
واحجب عليك الضر والحلو ليك يحضر
واذوق مهانه وزل علشان تذوق سكر
والهم ليا اتخلق وتعيش ولا تفكر
وحجيت عليك من البرد وداريك ف احضانى
ويوم ما احتاج اليك ما لقئش ترعانى
نزلت دموع من عينيها وبُكاها كان عالى
شق الانين السماء وصدرها العالى
هطلت علينا المطر وماكنش ده اونها
ورعود وبرق شديد زلزل ف اوصلها
طب طب عليها واحد لابس رداء ابيض
وقال يا امة الله رب السماء بيغضب
شكواكى رجت سمانا فاذلى انزلك
وابنك اهو بيتحاكم والعدل فيه اتقام
يرضيكى نحكم بايه ..نحكم عليه اعدام
صرخت قالت ابنى ده هو نبض الروح
لو ارضى ليه الاذية تبقى تهون الروح
خلاص خلاص يا رب قلبى عليه راضى
لو يعلم اللى جرى .. قلبى كان القاضى
يا رب يا رحمن يا ناشى فيا القلب
ازاى هتجى الاسيه وانت وهبته الحب
وفاقت من الغيبوبه ومليكه ترعاها
لو يعلم الابناء لتسابقوا لرضاها
للشاعر
جمال احمد عبد الرحمن
25-3-2017
ليست هناك تعليقات:
إرسال تعليق