(قالولى اكتب). ١٩/مارس/٢٠١٧
********************************
قالولى اكتب ف عيد الام
بحاجه تكون حاسس بيها
فقلت ازاى ح قول واكتب
دى كلمه تتوه ف معانيها
قالوا سهله دى كلمه ام
وياما اتقال كلام فيها
دى بالنسبه لى ..كلمة ام
شقى وعذاب قوى ماليها
ضنى ف الحمل ضنى ف الحمل
كلام ايه ده اللى يوفيها
دى كلمه بسيطه من حرفين
لكن ف المعنى ما اوفيها
سهر وبحب..مالى القلب
وشايله ضناها ف عنيها
قالولى اكتب ف عيد الام
بحاجه تكون حاسس بيها
ف عز البرد .......سهرانه
لا تشكى ف يوم ولا كلت
ولو حست تعب جالك
تبات واقفه ولا ملت
وعزيمه مهما بتقابل
بتقوى عمرها ما قلت
ورحمه ف قلبها ساكنه
من الرحمن ليها اتوهبت
وربى بعزته ...... اتوعد
بناره لو ف يوم غضبت
فياللى بتحكى ف الحرف
شوف المعنى الساكن فيها
قالولى اكتب ف عيد الام
بحاجه تكون حاسس بيها
انا أمى كانت ....... عندى
ف كان الخير زايد بالكوم
ولما كات ف يوم بتضيق
ما حسيت ساعه فيه بهموم
تواسينى ..... و ...بتطبطب
تقوللى الضيق ما عمره يدوم
وترفع ايدها تدعى يارب
وتحكى معاه بصوت مكتوم
مدارينشى بايه بتدعى
الاقى الهم بقى معدوم
والاقى السعد على بابى
وييجى الخير على ايديها
قالولى اكتب ف عيد الام
بحاجه تكون حاسس بيها
دا كفايه امى بدون علام
وكلامها كله مليان بحكمه
ومهما بتقابل..........الام
دايما بلاقى الرد رحمه
وف عز ما بتزعل نلاقى
للكل دايما راسمه بسمه
وحشتنى يامه ....طلتك
ووحشنى حضنك ويا ضمه
دا نور وجودك كان حياه
واتبدلت بعدك بضلمه
دى الام ليها فضل غالى
سامحينى لو قصرت يامه
واجعل يارب لكل ام
رحمه وزيد كرمك عليها
قالولى اكتب ف عيد الام
بحاجه تكون حاسس بيها
بقلم الشاعر /محمد الشاذلي
ليست هناك تعليقات:
إرسال تعليق