(((( نــفــســى ابــقــى نــــبـــــى )))))
****************
عبتواب مش بس حكاية شعر
وعنوان فى كتاب
أو عنوان بيطمن قلب الملهوف
على ضهر جواب
أو نظرة حب حقيقى
بين الاحباب
عبتواب مش حلم
دا علم *** حقيقه
لحظات الفرج اللى بيبعتها الرب
بعد الديقه
عبتواب هو الإيد الشقيانه
هو الكلمه اللى تِشد الحيل
هو الشمعه اللى تنور ضلمة ليل
عبتواب
كلمه ولحن وغنوه وموال
بيحب الخير للغير
ولا فى دماغه جَمْع المال
النُص الأول من عُمره
كان رَحَّال
******
والنُص التانى الهَمْ على كتافه
ما تِشِيله جبال
أى نعم الشَعر إبيض
فى راس عبتواب
إنما لو بصيت فى عنيه
وسمعت كلامه وحكاياته
تلقاه لسه شباب
عبتواب
أخ وأب وطفل وشاب
صاحبى وتوأم روحـــــــى
بَلْسَم لو زادت فِـيَّا جروحى
عـبتواب هو الإيد الشقيانه
رغم ان البعض
بشاور على عبتواب
ويقولوا عليه نصاب
كداب
وقلبُه ما لُوش شِبّْاك
ولا باب
عبتواب كل اللى يهمّه
هِدمه تِلمّه
لـُقمه تسد الجــــــوف
وينام من غير خوف
*****
كلمة عبتواب
مش بس نـُقط و حـروف
كلمة عبتواب
شمس تِدفى البردان
ضُليله فى عِـز القياييل
للشقيان
كلمة عـبتواب أجمل غِـنوه
وأحسن مواويل
مره سمعته بقول
كلهم شاورولى مره
وبصوابع الاتهام
قالوا غريب
قالوا غـــبى
*********
جايز غريب فى مطلبى
جايز غـبى فى مذهـبى
لكن حقيقتى ياحـبـيـبـتى
كان نفسى ابقى نبى
*******************
شــاعــر الـقــريــة
فـــيـــصـــل بـــدر
ليست هناك تعليقات:
إرسال تعليق