((( فتافيــــــــــــــت )))
**************
باب مكسور
شبّاك متْوارب
فلاح
شايل على كتفه الفاس
والليل....
بيلم خيوطه من الدرب
زى ساعات الصمت بعد الحرب
ونهار
بيداعب أغصان الاشجار
ورزاز التلج
بيهاجر من ع الاوراق
وخيوط الشمس المولوده
موجوده
وبترقص فى دروب الجسم
*******
أطفال
لابسين مرايلهم
وشًنطهم فى اكتافهم
رايحين الكًـتّاب
عيِّل شاطر
بيسمَّع لصحابه جزأ تبارك
**********
والحاج حسين
راكب على ضهر حمارُه وسارح
لساه متعافى من الوعكه امبارح
***
نبويه بتخبز
عامله كماج وفطير للأنفار
وسعاد بتلِم الشعر ضفيره
وتحُط الشال على راسها
وتشيل الطِشت
وصاروخ على شط الترعه
مواعين ..... وهدوم
واهو نفس الموال يوم ورا يوم
*********
فى الصبح مافيش تفكير فى هزار
زى خلايا النحل
هو احنا كدا
ما احناش هلافيت
زى الفتافيت
**********************
شاعر القرية
فيصل بدر
ليست هناك تعليقات:
إرسال تعليق