مرقص نصيف اقلاديوس ///////////////////////////////////////// قد ما تقدر عيش

مرقص نصيف اقلاديوس

قد ما تقدر عيش
بقلم..مرقص اقلاديوس
........
طول عمر الانسان
بيعانى من مشكلة
ما بيبعرفش يحلها
من و لادته لحد مماته.

ازاى يضيف سنوات لحياته.
مع إن المشكلة الحقيقية
ازاى يضيف حياة لسنواته.
طب بالحق
هوا ممكن يضيف.
آه طبعا
ممكن يضيف.
عايز تعرف
إن كان انسان
عايش حياته.
و لا مش عايش حياته.
دوٓر على انبهاراته.
إن كان الطفل
لسه جواه عايش
بفرحته و إنطلاقاته.
إن كان الصبى
لسه جواه عايش
بمبادراته و مغامراته.
و لا خلاص
كل ده إنتهى
و بقا من ذكرياته.
و الساقية واخداه و دايرة
و لا هوا حتى حاسس بمعاناته.
و من زمن
حط قفل على العلبة
اللى كان محٓوش فيها أمنياته.
لأ و كله كوم
و أحلامه كوم.
توقف عن الحلم نهائى.
كفاية عليه الكوابيس
اللى عايش فيها
فى نهاراته.
كفايا حساب للسنوات
و إرجع دور على الأمنيات.
كفاية تفكير فى اللقمة
الطير ربنا بيرزقه
و الدود فى قلب الحجر
ربنا مش ناسيه.
و الزرع بيطلع لوحده
ربنا اللى بيبعتله المطرا
و بيرويه.
إرجع دٓور على الجمال
و سبح ربنا عليه.
إرجع إملا قلبك حنان
و للجار و القريب و الغريب
إديه.
إرجع إملا عقلك ايمان
و سبح اللى قال
لكل ما فى الحياة
و لكل من فى الحياة
كن فكان.
ارجع افرح
باللى فى إيديك النهاردة.
هتلاقى النهاردة لوحده
يسوى عمر.
ملاح بحور الحكمة
مرقص اقلاديوس