عيونى
عيونى فى هواك / دابت
سهام رمشك فى الصميم / صابت
جروحى فى الهوى انفتحت / ولا طابت
ظنونى فى الغرام فشلت وعمرظنونى / ماخابت
دموعى برغم غلاوتها كمان نزلت / على خدى وانسابت
اشوف صورتك فى ضى العين / فى احلامى /فى صحيانى
اقول فينك حبيبى فين / ياساكن كل وجدانى
وليه عشقك لقلبى ضنين / وليه بتزيد فى حرمانى
وليه با أشعر كأنى سجين / وليه تقسى ياسجانى
بدونك والله أنا مهموم / ومتغرب فى دنيا سراب
وطيفك ع الجبين مرسوم / يصبحنى / يمسينى ف هوان وعذاب
صدى صوتك بيوقظنى ف عز النوم / بيسعدنى مع انه خيال كداب
وقلبى بيمنح الافراح لكن محروم / وليه تهجر وتنسانى بدون أسباب
عيونى عاشقه كل جمال / وحسنك مافى مثله اتنين
وسحرك مضرب الامثال / لكن فينك يانور العين
وعشقك سارى فى الاوصال / دلالك حلو والله وزين
عيونى تغنى 100 موال / نغم شادى لكنه حزين
ياريت ترجع حبيب عينى / تنام عينى على كفوفك
دى نار هجرك بتكوينى / قيثاره لحن فى حروفك
وليه فى النار بترمينى / قساوتك ليه مداريها ورا كسوفك
ومين فى العشق غير حبك هايحمينى / عيونى والله تتلهف على شوفك
انا فى العشق والله ماليش حبيب تانى / يا احبك انت ياحبيبى يا اما بلاش
ولو قلبك لا أى ظروف هينسانى / دى حتى الدنيا من غيرك ولاتفرح ولاتنعاش
شعر احمد اسماعيل / شاعر العرب
ليست هناك تعليقات:
إرسال تعليق