.................. زعلان منك ....................
بقلم / نصر فؤاد
..........................
ياعظامي من نبت راسي لأطراف صوابعي.
يامفاصلي اللي بيحتويها هيكلي وحتة مني.
يازرعتي جوايا بارويها بروحي.
ظللتي عليا وحر قسوتك بيلهب جروحي.
مابتصبريش عليا رغم إني صابر سنين.
واخدة خيري ومسلماه لغيري.. طب هو مين.
ياترى هو اللي عاش في حضنك ولا أنا؟
ياترى هو اللي حبك وعشق ترابك ولا انا؟
ياترى هو اللي زرع جواه حياتك.. حفر إسمك بين ضلوعه.. روى كيانك من دموعه.. خلى كل حتة فيكي تندهه .. تعشقه.. تتعبه.. تحطم قلوعه.. ولا أنا؟
ياعظامي من نبت راسي لأطراف صوابعي.
يامفاصلي اللي بيحتويها هيكلي وحتة مني.
مين اللي قال إني لحروفك باخون؟!
أنا لما غبت عنك كنت لترابك حنون!!!
كنت لما باشوف غيري في البلاد عايش قلبي بيبكي.
كنت لما باشوف شوارع في الليالي لوحدي حلمي بيحكي.
بيحكي عِشرة هانت وماتت وادفنت من غير صلاة جوة لَحْدي.
وانتهت كل كدبة عشتها بين خطاوي ترابك وأنا لوحدي.
ياعظامي من نبت راسي لأطراف صوابعي.
يامفاصلي اللي بيحتويها هيكلي وحتة مني.
مش هاقولك سامحيني ... أنا مش مسامحك.
طول عمرك مش قادرة تبقي حضن ليا وإزاي هابقى حضنك.
طول عمرك واخدة مني كل حاجة وإيه راح هاخده منك.
إنتي دايماً بتنسي إنك حياة وبتنسي إني حتة منك.
خدي كل حاجة... مش هاقولك تنسي حاجة... وحتى لما تنسي... هاديكي كل حاجة... عارفة ليه؟!
لأنك... إنتي كل حاجة..
للأسف إنتي كل حاجة..
بس خليكي فاكرة.. إن كل عمري ... وكل حتة مني.. للأسف.. زعلانة منك..
بقلم / نصر فؤاد
ليست هناك تعليقات:
إرسال تعليق