قصيده بالعامية المصرية
بعنوان : ليه الخوف ليه
بقلم الشاعر : محمد فخري السعيدي
******
دخلت عليه خاف
رفع إيديه
كأني ماسك سلاسل
حقبض عليه
ندهت عليه وصوتي عالي
طاطا راسه وحماه بأيديه
حركت أيدي
رفع عينيه
هرب لركن واستخبى فيه
قربت منه كشفت وشه
لقيت الدمع مالي عينيه
جيل معجون بالخوف
مش عارف خلفتوه ليه !
جيل بيقول آه قبل ما ينضرب
جيل بيموت قبل ما ينقتل
جيل قبل ما ينهزم يرفع إيديه
هو انتوا ربتوه على آيه ؟
مش هو دا جندي بكره
مش هو دا قائد بكره
مش هو دا مدير بكره
مش هو دا وزير بكره
مش هو دا ريس بكره
مش هو دا بردو ولا آيه ؟
ليه ربتوه عالخوف ليه؟
ليه القهر تعودوه عليه ؟
ليه زرعتوا فيه الجبن؟ ليه؟
واللهي حرام عليكوا
دي امانه بين ايديكوا
انتوا بتبنوا لينا آيه ؟
انتوا بتربوا لينا آيه ؟؟
ليست هناك تعليقات:
إرسال تعليق