انه ماتعبانه...................ابو رؤى قاسم الدوسري

انه ماتعبانه
من لَمْ القواطي،،،،
انه تعبني المشي
وفرت الشوارع
ناس تطلع بالفجر 
تلم القواطي
وناس نامت للظهر
وماتنوجع
دنية بالمكلوب ويانه تمشي
بس فلح
بيه الحرامي والضبع
دنيه بس اهموم والالام وتعب
صعبة العيشة كلش
ماتنجرع
تدري انت
طبع الذيب يغدر
شلون تترجه منّه
يغير الطبع
ياحسافة
من بعد ذيج المعزة
صرنه نفتر بالدروب بكل فرع
نلململ قواطي اليشربون بأدينه
وما نمد الأيدأحفاد
السبع
دنية خلتنه
حدر ايد الأنذال
ارد اكلكم
ياهو يقبل ياشرع
ناس تلعب بالملايين بأديها
وناس فقره
الجوع مالعها ملع
ناس تاكل من الزبايل
وناس موتهه البلع
عيب نسكت عالحرامية الأجونه
لازم نطردهم شلع
گلت اصيح بعلو صوتي
وينكم،،
أخرست الأصوات كلهه
وماكو صوت الينسمع
بيا وكت محد بحالك
ماكو نخوه،،،،ولا رَبع
تكاثرت هاي الأسامي
لاشريف اليوگف النه ولا ضلع
دمروا كلشي بوطنّه
لاصناعة ولا تجارة ولازرع
وما سلم كلشي من اديهم
موتو حتى الطلع
جونه صار اسنين عدنه
ابد ماشفنه منهم بس مصيايب
وطلع مابيهم نفع
فرقو هذا شعبنه
هذا سني وهذا شيعي
وهذا مو مسلم مسيحي
وخربوا كل الوضع
وصرنه نفتر بالشوارع
ونكضي احنه اعمارنه نذرع ذرع
وسفه مو هذا العراقي
هذا ابو الشيمه السبع
وسفه خلونه إنتخالف
وباگو الدوله قلع
ابو رؤى قاسم الدوسري

أعجبني